專門報導電動車消息嘅網站 Electrek 最近報導，韓國品牌 Hyundai 嘅大型電動 SUV IONIQ 9 開始進行路面實測，並且由媒體捕捉到諜照，提前曝光。IONIQ 9 係 Hyundai 首款有三排座位嘅電動 SUV，報導仲提供咗新車內櫳嘅照片，可以見到佢嘅空間相當充裕。
IONIQ 9 係基於 2021 年推出嘅 SEVEN 概念車打造，新車將於即將到嚟嘅洛杉磯車展正式發表。IONIQ 9 嘅外觀設計前衛而獨特，配備咗具系列特色嘅 LED 燈條，仲有流線型嘅車身輪廓。雖然無法從諜照得知 IONIQ 9 嘅具體車身尺寸，但預計會同 KIA 嘅 EV9 大型電動 SUV 相近。
從曝光嘅內櫳照片上可以睇到，IONIQ 9 嘅第二排腿部空間非常寬敞，估計超過 42 吋，遠比競爭對手如 Land Rover 等有更大嘅空間。據了解，IONIQ 9 採用咗 Hyundai 嘅 E-GMP 電動車平台，目前已經喺 Hyundai 嘅韓國牙山廠進行試產，並作最終質量測試，以確保產品嘅高質素。