節奏遊戲大家都認識，通常難度同按鍵數成正比，但今次介紹嘅《Rift of the NecroDancer》就例外，只有三個按鍵，聽落好似簡單，但其實巧妙地加入咗唔同規則，將遊戲化身成高難度，甚至中級難度都會令一般玩家手忙腳亂，不過……玩起上來真係好好玩！
《Rift of the NecroDancer》係由Brace Yourself Games同Tic Toc Games聯手開發，作為動作Roguelike遊戲《Crypt of the NecroDancer》的衍生作品，即使未玩過原作都冇問題，因為故事就係主角凱登絲被拖入現代世界，同怪物展開戰鬥。本作主要係節奏遊戲，並包括Boss戰同其他小遊戲。
遊戲嘅重點就係簡單嘅三個按鍵，按節奏點擊相應按鍵就可以啦，呢個部分同類遊戲相似，但掉落嚟嘅符號就變成咗怪物，呢啲改編係遊戲嘅精華所在。遊戲入面有多種類型怪物，每種都有唔同規則。例如藍色史來姆要點擊兩次；藍色蝙蝠要按兩次，但第二次嘅位置會移動（黃色嘅要三次）；疆屍會不停按照規則移動；而龍就需要長按等等。由於要處理多種規則，中等難度時會同時出現幾種規則嘅怪物，玩起嚟已經唔係易事。
遊戲會提供簡單、中等、困難同絕境四種難度，仲包含編輯工具讓你自訂譜面、混音模式（即係同一首歌同樣節奏但隨機譜面），並有全球排行榜支援。據消息透露，初推出時會有多達三十首歌曲，並會不斷添加新曲，試玩版已經可以體驗數首，歌曲旋律都相當吸引。
《Rift of the NecroDancer》預計將於2025年2月6日喺PC Steam上推出，支援繁體中文，仲有試玩版可以下載，而Nintendo Switch版則會喺2025年推出。此外，由於《Crypt of the NecroDancer》也有Xbox及PS版本，因此預計之後都會喺這些平台推出。
