Corsair 今年推出咗 K65 Plus 無線機械鍵盤系列，而最近再擴充產品線，加添咗 K65 Plus 無線鍵盤同 M75 無線滑鼠嘅 Mac 版本，並採用獨家配色，俾玩家多一個選擇。
呢兩款新嘅 Mac 用電競產品有「冰川藍」同「霜白」兩種色彩，K65 Plus 鍵盤繼續採用 75% 無數字鍵設計，配備「預先潤滑 CORSAIR MLX Red v2 線性軸」。功能鍵方面專為 Mac 版本而設，並加入配有 Mac 專用標誌嘅 Command 同 Option 按鍵。玩家仲可以透過 macOS 版 iCue 軟件自訂按鍵功能同 LED 設定等。
基本上，呢款 Mac 版鍵盤同滑鼠功能，除咗顏色同鍵帽設計外，與原 K65 Plus 鍵盤同 M75 滑鼠並無太大分別。所以無論係 Windows 版定 Mac 版，想喺唔同系統中使用都冇問題。連附帶嘅 2.4GHz 無線接收器都係 USB-A 插頭，因此套裝仲會附帶 USB-C 轉 USB-A 轉接器，方便冇 USB-A 插口嘅 Mac 使用。至於香港嘅售價同發售日期仍然未有公佈，有興趣嘅朋友可以持續留意。
