而家市面上流行嘅生成式AI聊天機械人都係需要用戶輸入指令先至可以作出回應，不過下一個重大里程碑就係能夠控制電腦自主行動嘅「AI助理」。根據消息指，除咗Google之外，OpenAI都喺開發相關產品，預備喺明年推出。
根據報導，OpenAI將推出一個叫「Operator」嘅自主AI代理系統，呢個系統能夠獨立操控電腦，執行各種工作，例如為用戶進行網上購物或者處理預約等。該公司計劃於明年一月向開發者推出研究預覽版本。現時，AI代理系統已經有多個競爭者，例如Anthropic為其Claude推出咗「Computer use」功能，能夠直接控制電腦，而Google據聞都會喺12月發表類似嘅產品。
OpenAI總裁Sam Altman最近喺Reddit嘅「Ask Me Anything」環節表示，雖然佢哋會持續改善現有模型，但下一個重大突破將會係AI代理。產品總監Kevin Weil亦預測，2025年將會係代理系統進入主流市場嘅關鍵年份。
