對於鍾意復古家具嘅朋友，相信大家應該對 IKEA 旗下嘅 Nytillverkad 系列唔陌生，呢個系列重現咗 60、70 同 80 年代嘅經典設計，當中包括多款椅子同紡織品。除咗推出新配色、大部分品項仲提供訂製服務。
Nytillverkad 系列嘅創意總監 Karin Gustavsson 指出：「只要喺系列中選擇一件產品，就能夠展示你嘅獨特個性，呢啲作品可以因應每個家庭嘅需求改變形狀同顏色。我哋從過去四十年汲取靈感，為呢啲單品重新構思，展現出一種清新又新穎嘅感覺。」
而近期 IKEA 將再次推出 Nytillverkad 系列第六波新品，以下就讓我哋一齊嚟睇睇。
呢款折疊椅採用耐用嘅帆布面料搭配結實的金屬椅腳，由設計師 Niels Gammelgaard 打造，依家已經成為收藏品，價值不菲。
由 Gillis Lundgren 設計的 DYVLINGE 旋轉椅，亦即係所謂的「anti-stress armchair」，1967 年首次推出，至今已經係品牌中最成功嘅設計之一。
同樣來自 Gillis Lundgren，呢款 SOTENÄS 當年推出時被形容為「年輕而喜慶」，設計獨特。
而 BYAKORRE 層架絕對係系列中最受歡迎嘅作品之一，佢使 Niels Gammelgaard 在年輕消費者中成名，更新版本嘅邊緣換上咗不同色調，大家可以根據自己嘅喜好進行訂製。
呢款圖案寢具係 IKEA 最早推出嘅紡織品之一，目的是讓顧客喺雲朵般嘅天空中安然入睡，隨住生產規模嘅擴大，設計師 Sven Fristedt 對圖案進行調整，以適應輪轉印刷。
KLIPPBRACKA 紡織品則係以爆米花形狀作為靈感，由 Anna Efverlund 創作，展現咗 90 年代嘅大膽圖形。
名為 KÄLLARHALS 嘅花瓶同樣出自 Anna Efverlund，佢哋採用球狀和彎曲嘅形狀首次出現於 1995 年，依家重新推出，顏色鮮明包括亮眼嘅黃色同橙色。
最後，係由 Erik Wørts 打造嘅 GUTTANE 桌子，原本係個長凳名為 NOVETTE，搭載堅固嘅橡木腿同橡木貼面，實用之餘仲非常優雅。
Nytillverkad 系列第六回新品將會喺近期登陸全球 IKEA 銷售點同官網，期待大家好好享受呢啲富有復古風格嘅精品。
