最近身邊不少朋友都問過，有冇啲好玩嘅多人 PvE 遊戲。今年有用腳做平衡嘅《Helldiver 2》，十六人合作打蟲嘅《星河艦隊：滅絕》以及玩得幾好但仲未有新關卡嘅《戰鎚40K：星際戰士2》。而明年將會推出嘅新作《Rogue Point》就可供玩家選擇，佢主打四人 PvE，仲有隨機玩法，真係最啱想同朋友一起共鬥抗敵嘅玩家。
《Rogue Point》係由 Crowbar Collective 開發，呢個團隊知名於超強重製版《Half-life》的《Black Mesa》。呢款 Roguelite 動作射擊戰術遊戲，有第一人稱視角，支援最多四人線上合作。故事背景設定喺一班企業巨頭各自雇佣名為「MERX」嘅私軍，玩家就化身為獨立的治安小隊「Rogue Point」，為反抗企業而戰。雖然想話係反抗企業，不過我覺得不如試下參加《拳願》來解決糾紛啱啱。
遊戲流程相當簡單，玩家需要參戰、賺錢，再購買新裝備與武器，進入一個不斷循環嘅過程。據了解，地圖包括機場、購物中心、辦公室同油田等，並且每次地圖結構會隨機生成。玩家初期只會有手槍同防彈背心，想獲得更強裝備就要等「絕殺空投」出現，隨機獲得槍械同裝備，並且無法通過其他途徑獲得。此外，根據官方資料，預計會有 22 種武器、11 種戰術裝置、25 種配件（例如消音器、加長彈匣等等）同埋 55 種裝飾物品。
敵方陣營「MERX」傭兵團共有五種職業，由 AI 操作，呈現出各種不同戰鬥風格。有最常見嘅普通士兵，裝備有手槍、突擊步槍及手榴彈，通常以小隊形式行動；狂戰士則瘋狂衝過來揮刀的；狙擊手會進行遠距離的爆頭攻擊；重裝兵雖然行動緩慢，但防禦力超強；最後係最強敵人「五星」，只會喺最尾任務出現。雖然各職業似乎互補，但如果只得呢五種敵人，可能玩家玩久會感到膩味，建議參考一下《Rainbow Six: Siege》上面多樣化嘅職業設計。
《Rogue Point》將預定喺即將到來的2025年內推出搶先體驗，並會對應 PC Steam 平台。
