將在6月18日（四）開幕的國際汽車博覽會上現身的MG4 Urban，雖非大家想要好耐的半固態電池版本，但外觀都是全新設計，只是配備傳統電池而已。有趣是舊款MG4繼續有得賣，想買MG4的朋友就要睇清楚，唔好買錯舊款——雖然舊款都好揸，但科技這東西當然有新買新！
沒錯，現時行入去代理處是可以買到新舊兩款MG4，所以買車前要問清楚，但其實在內地一樣有兩款MG4——MG4和MG 4X，前者是港版新款，後者則是配半固態電池的MG 4X，兩者造型有明顯分別之餘，車名個4字前面有個空位，非緊貼MG排列，在內地買MG4就更加要留意。
說回眼前的「港版」MG4先，整體造型的確較前好睇好多，而且車身加入不少Cyberster元素，例如車頭前方的入氣口，以及箭咀形尾燈，難得在這個尾燈放在MG4身上完全無任何違和感，而且仲比Cyberster好睇好多。另外，港版有七種車身顏色選擇，但在內地六款車色都是黑頂two-tone，其中以黑配藍最好睇，買了新車的朋友可以參考這個顏色配搭。
至於車廂佈局亦見驚喜，試駕車配淺藍白雙色再加紅色縫線，有心思之餘睇得出廠方刻意將MG4年輕化，跟老餅舊款相比完全是兩個唔同世界。雖然內地電車的車廂佈局都非常公式化，每間廠每個款都是差不多，並沒有自己特色，似從同一個源頭買回來。但眼前的MG4就非同一個模倒出來，睇得出有花思設計，而且錶板台的編排亦很討好。另外，新車尺碼為4.39米長、1.84米闊、1.54米高，輪距2.75米，較舊MG4有明顯增長，所以車內空間非常闊落，尤其欣賞後座座墊較一般電車為高，可以為大腿提供充足承托。
目前的新MG4只配53.9kWh和一個前置摩打，輸出160匹馬力及250Nm扭力，數據上唔算特別突出，但勝在底盤夠紮實，而且轉向表現靈活，雖未如上次試駕的T03般好玩，不過作為家庭車，整體表現是可靠，畢竟它另一個大市場在歐洲，懸掛設定亦偏向歐洲化，夠韌度之餘又不會太彈。可惜它在「一換一」完結之後才到港，不然應該會有更好發揮！
| 規格 | |
| 電池容量 | 53.9kWh |
| 最大馬力 | 160匹 |
| 最大扭力 | 250Nm |
| 續航 | 405公里 |
| 驅動 | 前置摩打，前驅 |
| 尺寸 | 4,395 x 1,842 x 1,549mm |
| 輪距 | 2,750mm |
| 輪胎 | 205/50R17 |
